كفايه يا عينى بُكى.................. بقلم زغلول الطواب
وكفياك يا قلبى نواح
إللى حصل حصل
خلاص عدى وراح
ولا نهار الشتا
هيبطل مطر
ولا ليل الصيف
هيبرد الجراح
الورد لما ينقطف
يدبل
يروح عطره الفواح
نامى يا عينى
فى العسل
وأهدى يا قلبى وأرتاح
إللى ظلمنى
سبقنى وأشتكى
والشكوى مع البُكى
تحرك فى القلوب الجراح
والقاضى لما حكم
خدعته دموع التمساح
يفيد بأيه الندم
بعد ما القلب أنسجن
مهما سكن
تحت الضلوع قداح
صبا النفس لما بينكسر
يفيد بأيه الندم والنواح
الأرض لو ملحت
تفيد بأيه الفلاح
إللى ظلم خلاص ظلم
والظالم لما ظلم
فاكر أنه نام وأرتاح
ربك مهما صبر
على الظالم يمكن ينعدل
مش هينسى
حق إللى أنظلم
هما طال الزمان وراح
العدل شيمة ربك
لكن يوم الحساب
تشهد عليك إيديك
وكل ذنب فضاح
نام يا قلبى وأطمن
وبطلى يا عينى
بكى ونواح
لابد من إللى ظلم
قلبه فى يوم ينكسر
يا ظالم عمر الندم
ما هيرجع إللى راح
إللى يدوق الظلم
ما تبطل عنيه بُكى
ولا قلبه يهدى
ولا يرتاح
آه من الجفون
إللى دابت
من دموع العين
إللى سابت
لو كان بأيدى
كنت غمضت عينى
وقفلت على قلبى
بمليون مفتاح
الليل أوقاته طالت
وباخت
حتى القمر
ضيه باهت
والسهر كيف السفيه
واخدني وموادينى
فى بحر الدموع سواح
عنيا كيف المطر
والقلب ما مرتاح
يا ظالم ياللى
قلبك حجر
يوم اللقاء دباح
شكوتى مش للبشر
شكوتى للخالق
الفتاح
الدنيا كيف الغربال
تغربل الأعمال
والآخره ميزان
تفرق بين الفشل
والنجاح
بقلمي
زغلول الطواب
تعليقات
إرسال تعليق