(مش باقي مني) ,,,,,,,,,, بقلم,,,,,,, رضا علي احمد ابو شنب

قصيدتي الجديدة
الاسم

رضا علي احمد ابو شنب
محافظة الدقهلية
مدينة ميت غمر
قصيدتي الجديدة
(مش باقي مني)
مش باقي مني
غير نظرة في الصورة
جواها هم وخوف
و الصرخة مكتومه
تلاقيني زي السعيد
وانا نفسي مكسورة
عايش في جو العيد
والضحكه مرسومه
لو يوم تبص في ملامحي
تحسبني فزورة
والجرح ينزف بجرحي
والدمعة محظورة
وان يوم داريت الخوف
يظهرلي علي القورة
*******************
مش باقي مني
غير كلام مكتوب
طافح في قلبه المرارة
والامل مرعوب
عايش حياتي بغرابه
واهي ماشيه بالمقلوب
ويمينها يضرب شمالها
والشرق فيها جنوب
كان نفسي امسك في ديلها
واطلع بنفس الذنوب
وارفع ايديا لربي
يقبل صلاتي واتوب
واكتب مصيري بايديا
واعطف علي المغلوب
يكبر نخيلي في ارضي
وانضرب بالطوب
*******************
مش باقي مني غير صدي للصوت
بيلف بيا ويندفن في سكوت
وابعد والاقي صوتي يسبقني
ويرد ليا تاني في الملكوت
والقي العزول قدامي بيلومني
ازاي سهامه فيا مش بتفوت
رغم انه عايش لاجل يقتلني
وفوق ضلوعي كسر النبوت
وازاي جروحي مش بتئلمني
رغم اني نايم جوه حضن الموت
بشكي همومي للي علمني
ازاي اسبح جوه بطن الحوت
رغم اني ظالم نفسي يسترني
والستر منه لو بورقة توت
واصبر علي الدنيا مهما بتظلمني
واترك حدودها بس جوه تابوت
مش باقي مني غير كلام في سكوت
والكلمة تطلع بس بعد ما أموت
************************