الزمان الجميل ...بقلم,,,, الحساني عبد العزيز

 الزمان الجميل ...

من منا من جيل الزمان الجميل لم يتذكر ..

سينما موريطانيا أو المارشي نوار ..

أو ولاد الكاريان أو الدوار ..

أو ميل فاي فلونطراك .. أو من الزريعة كول ما جاك ..

أو الحيرگات .. لي كيتفوقوا فيها لولاد ع لبنات ..

أو دينيفري .. لي فرقة مور فرقة تجري ..

أو شكون نسى الفران .. أو الفرق بين خبزنا أو خبز الجيران ..

أو حلوة الفرفارة .. أو مزينها ب لوان ..

أو جبان كول أو بان ..

أوشكون تفكر لبي .. أو فيك ولا ف لا إين ..

أو كرم تمة تكرم .. ولي خسر يموت ب السم ..

أو شريطة أو لاستيك .. بين هاديك أو ديك ..

أو حابا .. أو مولات النگاب أو الجلابة ..

أو شكون نسى النفار أو الطبال .. لي يخلي نعاسك موحال ..

أو عروسة أو عريس .. ف ليلة لخميس ..

أو لحرايمية أو البوليس .. أو اللعب ب لقصب أو الغيس ..

أو لقيوش .. الثاني أو الثيلوت أو الريبوع أو الخيموس ..

أو شكون ما كلا لحشيشة أو غريبة أو ل هيلال ..

أو عيساوة أو جيلالة أو هداوة أو ناس الحال ..

شكون نسى غمايضة .. أو الدور ..

أو لغرارف أو القصبة ف بلاصت الموطور ..

أو لحلاقي .. أو جيب يا فم أولاقي ..

أو لما أو السقاية .. أو الگراب مول لحكاية ..

أو زيد أو زيد .. أو شلا ما داز فالزمان الجميل ..

حكايات يعاودها النهار ل لليل .

( الحساني عبد العزيز )