طب ليه.....بقلم,,,,,اشرف الشناوى
..........طب ليه............
طب ليه
الجرح يكون
من أقرب ناس
مش كنا زمان
اقرب من كدا
احساس
معقوله الدنيا
تغير كدا
فى قلوب الناس
وتزق العالم
جوا متاهه
ماليها اساس
مش كنا زمان
انضف بكتير
أيام القله
وشرب الزير
مش كنا زمان
نلعب ونطير
مش كنا زمان
زى العصافير
اول مالشمس
تزق الباب
والصبح يدق
على الشبابيك
ويفتح كل عيون
الورد
ولا كنا نخاف
من شتا
او برد
ماهو كان الدفا
فى قلوبنا
كبير
ماهو كان الكل
ساعتها فقير
وبيوت بالنى
ماليها ضمير
مش كنا زمان
احسن بكتير
الوقتى الخير
اصبح قناطير
طب ليه واقفين
عالعيش
طوابير
طب ليه بندوس
على بعض
فى وسط الزحمه
ولا حد يراعي
شعور غلبان
طب ليه أصبحنا
كما الغربان
والخوف بيدق
اوتاده
فى قلب الدور
ويدوس عالحلم
ان بان
فى النور
ويهز فى روحنا
فتنزل
زى ازاز مكسور
مش كنا زمان
احسن
بالكستور
بالدبلان بالنمور
مش كنا بنضحك
م الحواديت
مش كنا زمان
زى العفاريت
ماكانتش بتفرق
ويانا جحور
ولا ضلمه
ولا حتى قصور
مش كنا زمان
احسن بكتير..................
اشرف الشناوى
شاعر عاميه
البرامون
المنصوره
تعليقات
إرسال تعليق