زجل: "زمان الضيق",,,,بقلم,,, محمد السوارتي الادريسي
زجل:
"زمان الضيق"
كيت اللي حصل ف الطريق
ف زمان الزحمة والضيق
لا صاحب يوجد لا صديق
تغيرت لعقول بكثرة لهبال
كلشي أصبح عبيد المال
ما بقا يتفرق لحرام من لحلال
إمتا يصفا الجو ويبان لهلال
ترجع الخوا والصحبة دي زمان
والصدق والمحبة وحياة الأمان
يتحابو الجيران وتصالحو الإخوان
ويثمر الصدق والبر والإحسان
نتواصلو بالخير بلا خبث وبهتان
ونشوفو من حال الضعيف العيان
أنشدو بيد لفقير المسكين الغلبان
ونكونو ضد الظلم والحكرة والطغيان.
باش ترجع لينا ليام الباهية الزينة
أوتفرح كل نفس مهمومة غبينة
ف القريا والباديا أف كل مدينة
ونعيشو حياتنا بالهنا والسكينة
ونطلبو الله العالي لكريم إنجينا
ويحفظنا من أهل لمكر والضغينا
وانصليو على النبي الرسول نبينا
سيدنا محمد المختار الشافع فينا.
بقلم.
محمد السوارتي الادريسي
تعليقات
إرسال تعليق